May 21/2011  

Beeraleyda ku dhaqan gobolka Jubbada hoose ayaa ku mashquulsan tabcashada dalagyada kala duwan iyadoo lagu gudo jiro xilliga gu’ga oo ah xilliga beeraleyda Soomaaliyeed ay uga faa’iideystaan tabcashada dalagyadooda.

Deegaanada gosha ee dhanka waqooyi kaga beegan magaalada kismaayo ayaa waxa laga dareemayaa dhaqdhaqaaq dhinaca tabaca ah oo ay wadaan beeraleyda waxaana tuulooyinka sida weyn looga dareemayo dhaqdhaqaaqa dhinaca beeraha kamid ah tuulooyinka; Wirkooy, Zanguuni, Mogaanbo Kamsuuma iyo Araare oo dhamaantood ah ubucda waxsoosaarka beeraha ee gobollada Jubooyinka, waxaana beeraleyda ku dhaqan tuulooyinkaasi ay ku mashquulsanyihiin tabcashada dalagyadooda.

Max'ed Siciid oo isagu beer ku leh tuulada Wirkooy oo aan ka wareysannay howlahooda shaqo ayaa sheegay in lagu gudo jiro xilli roobaadka islamarkaasina ay tahay xilliga ugu haboon ee wax la beerto, waxaana uu sheegay in ay uga faa’iideysanayaa xilliga gu’ga beerashada dalagyadooda.

Mar aan weydinnay waxyaalaha ay beeraleyda gobolka J/hoose sida saa’idka ah u beerayaan sanadkan ayuu noo sheegaya in waxyaalaha ugu badan ee ay beeraleydu abuuranayaan ay kamid yihiin Liinta, Muuska, Galleyda , Sisinta, Digirta iyo weliba qudaarta oo uu sheegay in sanadkan siweyn ay beeraleydu u beeranayaan.

Gobolka J/hoose waxa uu kamid yahay gobollada dalka Soomaaliyeed ee ugu badan dhanka waxsoosaarka dhulka, waxaana jiro beeraley fara badan oo iyagu aan awoodin in ay ka faa’iideystaan biyaha webiga islamarkaasina suga xilliga gu’ga, haseahaatee dhulqodotada gaar ahaanna kuwa wax ku beerta hareeraha webiga Jubba waxa ay had iyo jeerba cabsi ka qabaan in uu ku soo fatahmo webiga jubba islamarkaasina uu baabi’iyo waxyaalihii ay beerteen, maadaama webiga jubba uu aalaaba fataho marka la gaaro xilliga gu’ga oo ay roobabku siweyn u da’aan

*************************